Banner
Биеэ үнэлсэн гэх Big Bang хамтлагийн Seungri урлагийг бүрмөсөн орхиж байгаагаа зарлалаа
0
2019/03/12

Өмнөд Солонгосын хамгийн алдартай хөвгүүдийн хамтлагийн нэг болох Big Bang-ийн гишүүн, тансаг амьдралын хэв маягаараа Солонгосын “Агуу Гэтсби” хочтой болсон Сюнри биеэ үнэлэгчидтэй холбогдсон дуулианы улмаас “зодог тайлж байгаа”-гаа өчигдөр зарлажээ.

Тэрээр хамтлагийнхаа менежмэнтийн агентлаг болон бусад гишүүдийн нэрийг өөрийн холбогдсон дуулианд хутгахгүйн тулд ийм шийдвэр гаргасныг инстаграм хуудсандаа мэдээлсэн юм.

Big Bang хамтлагийг төрүүлсэн YG Entertainment компанийн хувьцааны үнэ Даваа гарагт 14 хувиар унажээ. Бусад энтертайнмент компаниудын хувьцааны үнэ ханшид ч Сюнригийн мэдэгдэл нөлөөлсөн байна.

Одоо 28 настай Сюнриг өөрийн стартап компанид хөрөнгө оруулалт татахын тулд гадаадын бизнесмэнүүдийг Ганнам дүүрэг дэх хэд хэдэн шөнийн цэнгээний газруудад биеэ үнэлэгчидтэй зугаацуулж байсан гэж сэжиглэжээ.

Биеэ үнэлэлт нь Өмнөд Солонгост хууль бусд тооцогддог тул Сюнри гурав хүртэл жилийн хорих ял сонсох магадлалтай болсон байна. Үүнээс гадна Сюнригийн олон нийттэй харилцах менежэрээр нь ажилладаг Сөүлийн “Burning Sun” шөнийн клубт мансууруулах бодис хэрэглэх, бэлгийн хүчирхийлэл үйлдэх хэргүүд гарсан гэх баримтыг хуулийнхан шалгаж эхэлжээ.

Өөрийгөө ямар ч буруугүй гэж үзэж байгаа Сюнри нэр төрөө цэвэрлэхийн тулд бүх анхаарлаа хандуулж ажиллахаа фэнүүддээ амласан байна.

Тэрээр энэ сарын 25-нд цэргийн албаа хаахаар төлөвлөж байсан юм. Өмнөд Солонгосын 18-35 насны бие бялдрын хувьд боломжит бүх эрчүүд доод тал нь 21 сарын хугацаанд цэргийн алба хаах үүрэгтэй байдаг.

Цагдаагийнхан түүнийг цэргийн алба хааж байх үед нь хэргийг шалгах боломжтой гэж мэдэгджээ. Харин армийн удирдлага Сюнри бичгээр хүсэлт гаргавал цэргийн алба хаах хугацааг нь хойшлуулах боломжтой гэж мэдэгдсэн байна.

2006 онд байгуулагдаж эх орондоо төдийгүй дэлхий дахинд алдаршсан Big Bang хамтлагийн таван гишүүний гурав нь хугацаат цэргийн алба хааж байгаагаас тус хамтлагийн уран бүтээл түр завсарлаад байгаа юм.

 

Эх сурвалж: Yonhap News

 

Мэдээлэл


Хэрэглэгчийн оруулсан сэтгэгдэлд манай сайт хариуцлага хүлээхгүй болно.
Copyright © 2018 paparatsi.mn Зохиогчийн эрх хуулиар хамгаалагдсан. Мэдээлэл хуулбарлах хориотой болно.